In chest articul, la Regjon Friûl Vignesie Julie e ven descrite tai tiermins di une “Plateforme teritoriâl strategjiche”
L'autôr, che si ocupe di planificazion teritoriâl, al è cussient che cheste no je la uniche descrizion pussibile di une regjon. In chest câs, però, si à di ricognossi che cheste specifiche regjon e à, almancul in tiermins gjeografics, dutis lis potenzialitâts par rigjavâ une vore di vantaçs da la sô posizion te lidrîs dal coridôr Baltic-Adriatic, che al è un coridôr European (lunc la direzion Nord-Sud) individuât di resint (2013) dentri dal “Core Network” de rêt transeuropeane di traspuart (par inglês Trans European Network for Transport - TEN-T).
Par che lis potenzialitâts gjeografichis a puedin jessi trasformadis intune reâl e concrete oportunitât di disvilup par dute la regjon, bisugne che i puarts maritims regjonâi a sedin potenziâts e colegâts in maniere plui eficiente cun dut il sisteme logjistic e infrastruturâl de regjon. Tal stes timp, chest sisteme al à di jessi colegât in maniere plui eficiente cu lis plui impuartantis zonis produtivis da la regjon. Cheste prospetive, par realizâsi, e domande che lis politichis publichis (sedi a nivel nazionâl sedi a nivel regjonâl) e la planificazion regjonâl dal teritori a disponin chestis filieris tal teritori fisic reâl, ancje come precundizion par atirâ sedi invistiments privâts, pe realizazion des infrastruturis che ancjemò a mancjin, sedi operadôrs eficients te gjestion dai servizis di traspuart. Ma chescj a puedin jessi atirâts dome se lis decisions e i plans publics a rivin a sigurâ un cuadri di sieltis politichis stabilis e timps e regulis di implementazion ciertis e afidabilis.
